Amajwi Y'i Rwanda

Follow 0 fans

Sylvestre NSENGIMANA

4:17

1 View

 Become A Better Singer In Only 30 Days, With Easy Video Lessons!

Mbacire umugani mbabambuze umugano
Nuzava ikantarange azasange ubukombe bw'umugani
Bukiziritse ku muganda w'inzu!
Uyu si umugani ni impamo.
Ndashaka kumva amajwi y'I Rwanda!
Ndashaka kumva inanga.
Ndashaka kumva umwirongi,
Nkumva umuduri.
Ndashaka kumva ikondera ritsikimba
Ndorera inkumbu y'inkumburwa z'iwacu
Nkumbuye amajwi meza y'I Rwanda,
Mu Rwanda iwabo w'inyambo.
AMAJWI: INKA ZABIRA
IGIKOBWAKOBWA, AMAHAMBA
Nyereka ba bakobwa bazi gutega amaboko!
Abasore b'ibigango baca imigara,
Abakaraza bizihiwe n'umurishyo.
Nzanira ba Munyakazi dutarame cyane,
Unzanire na Mwiza duhuze urugwiro,
Oya si ukugoma urungano rurayaaga
Ku gicamunsi nkumbura akazuba karengera mu misozi yaho,
Intore nakumbuye nkumbuye ibyivugo by'iwacu.

RUTEBUKA NDI INTWARI UMUHUNGU WA MBARAGA
UMUGABO W'INDEKWE SINSIGARIZWA NTURWA IBIGEGA.

Indirimbo: Dore akazuba keza k'iburasirazuba, karaye karigenda none dore ngako karahingutse!
Ku ntango isomwa n'intwari!
Mu mihigo idahigwa n'ibigwari,
Ndashaka kumva amajwi y'urumenesha,
Mfunze amaso nteze amatwi imisozi igihumbi,
Nsusurutsa shenge none naje ngusanga.
Amajwi y'i Rwanda!
Ayo nkumbura ndi mu Rwanda,
Ayo nkumbura ndi mu rundi Rwanda,
Hari umwihariko mu budasa bwayo
Yifitemo rukuruzi inkururana urukundo,
Ndorera inkumbu y'inkumburwa z'iwacu,
Mu Rwanda iwabo w'abeza.
Abeza bo mu rukari!
Abeza ba Asitirida
Abeza b'i Kigali,
Aba Nyagatare, Rubavu, Karongi n'I Musanze,
Abeza b'I Nyamata, nyaruguru n'I Muhanga
Sinibagiwe Kamembe, Kayonza, Ruhango n'ahandi
Ndorera inkumbu y'inkumburwa z'iwacu
Nkumbuye ubupfura n'umuneza by'abi Rwanda.
KWINIKIZA: Uh-hmm, uh-hmm
Uh-hm-hm- iyee-eh-he-eeeh!
Ndashaka kumva icyanga cy'ayera!
Abakobwa ku ruhimbi bizihiwe bacunda.
Urungano ruhonootse umurimo rutera ubuse mu kabwibwi,
Abangavu bayaaga iby'ubukumi bwabo,
Ku dutwenge dushamaje nk'utunyoni two mu rucyerera,
Ndashaka amajwi y'iRwanda y'uje ubumuntu,
Mfunze amaso nteze amatwi imisozi igihumbi,
Cyono nimwugurure iyiriwe ahandi itashye I Rwanda.
Iyo ihageze turizihirwa!
Turatarama tugacyesha,
Bibe ku mwezi, bibe ku gicaniro.
Intore z'irahamiriza, abakobwa bagashagirira,
Abikirizi baratwarwa cyane, mu majwi meza y'urumenesha,
Kirazira kwizihiza abakugana uzinze umunya;
Ngo umutima mwiza ni mugenzi w'Imana,
Dore ngiyo imvano y'inseko iseretse.
Indirimbo: Umenya kataryama nta roro nkabonana, nta butuna gafite cyangwa kiyuhagiye mu maso!
Ndashaka kumva amajwi meza y'I Rwanda!
Ndashaka kumva amajwi y'umwimerere,
Ndashaka ay'urumenesha yiisa mu isi nzima,
Mbwirira abakurambere uti mwarakoze kuturaga uyu muco.
Umusizi usize amasoso yombi
Uwo Rugira yasobetse inganzo itari imigenzo;
NSENGIMANA Sylvestre

 Become A Better Singer In Only 30 Days, With Easy Video Lessons!