Þæs ofereode ðisses swa mæg

Follow 0 fans

Æþelruna

25:50

1 View

 The easy, fast & fun way to learn how to sing: 30DaySinger.com

Welund him be wurman wræces cunnade
Anhydig eorl earfoþa dreag
Hæfde him to gesiþþe sorge and longaþ
Wintercealde wræce, wean oft onfond
Siþþan hine Niðhad on nede legde
Swoncre seonobende on syllan monn

Þæs ofereode, þisses swa mæg

Beadohilde ne wæs hyre broþra deaþ
On sefan swa sar swa hyre sylfre þing
Þæt heo gearolice ongietan hæfde
Þæt heo eacen wæs; æfre ne meahte
Þriste geþencan hu ymb þæt sceolde

Þæs ofereode, þisses swa mæg

We þæt Mæðhilde mone gefrugnon
Wurdon grundlease Geates frige
Þæt hi seo sorglufu slæp ealle binom

Þæs ofereode, þisses swa mæg

Ðeodric ahte þritig wintra
Mæringa burg; þæt wæs monegum cuþ

Þæs ofereode, þisses swa mæg

We geascodan Eormanrices
Wylfenne geþoht; ahte wide folc
Gotena rices; þæt wæs grim cyning
Sæt secg monig sorgum gebunden
Wean on wenan, wyscte geneahhe
Þæt þæs cynerices ofercumen wære

Þæs ofereode, þisses swa mæg

Siteð sorgcearig, sælum bidæled
On sefan sweorceð, sylfum þinceð
Þæt sy endeleas earfoða dæl
Mæg þonne geþencan þæt geond þas woruld
Witig Dryhten wendeþ geneahhe
Eorle monegum are gesceawað
Wislicne blæd, sumum weana dæl
Þæt ic bi me sylfum secgan wille
Þæt ic hwile wæs Heodeninga scop
Dryhtne dyre; me wæs Deor noma
Ahte ic fela wintra folgað tilne
Holdne hlaford, oþ þæt Heorrenda nu
Leoðcræftig monn, londryht geþah
Þæt me eorla hleo ær gesealde

Þæs ofereode, þisses swa mæg

 The easy, fast & fun way to learn how to sing: 30DaySinger.com